MO Srdoči

12.03.2019.

Maškare pul Srdoč

Maškare su prihajale, ovo leto ih je bil lep broj, najveć do sad.

Maškare pul Srdoč

Komunjska šterna va centre stareh Srdoč – pusni pundejak 4.03.2019. na polne.

Tradicijsko maškarano okupljanje maškar od Srdoč i judi od Srdoč. Na šternu su, vredni del grupe maškar, prej nego su se namaškarali, prnesli  šator, pa se okol njega šterna ukrasila šarenemi vrpcami krep karti, i postavil gps maškar od Srdoč kuda se kreću na pusni pundejak, ča je dalo znak da se tu neč dogaja. Stol je bil lepo popunjen s puno vrsti hrani, slane i slatke, a bil je tu i veli lonac fažola, kolači, krafne.

Maškare su pomalo prihajale, ovo leto ih je bil lep broj, mislin najveć do sad.

Bilo je veselo, tancalo se, kantalo, čulo nas se,- i vreme nan je šlo na ruku, prelep sunčani dan. Semu je lepotu dala i dobra muzika, čuli su nas si Srdoči.

Tako smo nakon malo druženja i veselja, maškare od Srdoč otpratili da obajdu Srdoči, po onen našen gps ki je tu bil postavljen, puno njih ni znalo da postoji, bil je dosta gledan.

Ostali smo na šterne čekat Zamećani, vavek se neki malo razidju ma kad se čuje zvončarska zvonjava opet se šterna puni z judi ki ih vavek va velen broje pridu videt. Počastili smo Zametski zvončari i maškari sen ča smo imeli, mislimo da je pofalilo fažola, morda ga treba drugi put više skuhat. I ovo su leto mej Zametskemi zvončari bili i naši Srdočani. Ćakulali smo, neki su zainteresirano pogledali naš gps kretanja maškar na pusni pundejak, doznali  da ih je va grupe prišlo 50 zvončari i fanj maškar, pa je šterna bila premića. Imaju dobru glazbu, sopli su, bilo je veselo, ma ni naša ni prestajala, ma nakon nekoliko tega veselja i druženja i oni moraju naprvo poć.

Utorak 5.03.2019. – na Dan pusta  – šušur va atrije Škole Srdoči kega su svojen posjeton storile Maškare od Srdoč. Bilo je veselo, živo, deca su uživala, prigodno si su dočekani z’ulenjaki.

Prej tega šršura deca Školi su va povorke pasali po naselju i na školsken igralište osudili i zapalili Pusta. Na početke povorki nosil se j’ “maj” kega su deca ukrasila na radionice 22.02.2019.

I dve besedo o tradicije ku čuvamo z’ ovemi programi, vavek i z’ nečen noven, pa smo na pozive za maškarano okupljanje objavili za sad najstareju sliku maškar od Srdoč, negde z 60. let prošlega stolječa, ku čuva Ivo Vlah od Grbac, a storena jušto na toj istoj šterne na koj su okupljanja i danas.

I bilo bi ovo se o maškarama pul Srdoč za ovo 2019. leto, verujemo da su veselje i šršur ki se je dogajal pomogli otirat se grdo ča je bilo i zimu ka još malo dura pa ostajemo čekat dani proljeća.

Za Mavricu, Nada Paladin

Tagovi:
Dijelovi grada:
  • Srdoči