Vinil je finil

24.04.2018.

Ča? Metal!

Autor: Vlado Simcich

Dva san dani mislel kako bin ovisti album predstavil. Najprvo san pročital teksti z omota, napol su istrijanski, a oni drugi del je na primorsken čakavsken, pače, domaćen. Onput san pustil CD da mi zasope. Ćo, to su vražja dela, rekal sam za se. Aš tu je tista kombinacija etno elementi i teškega metala, a i oni kantador, zove se Č.R.U., voli fanj zijat va mikrofon. More bit da mu se j' ki zameril. A morda je mu samo takov horoskop, ki će znat.

Vava - Vinil je finil

Metal sopnjava išće od seh ki su uključeni va proces maksimalni doprinos, pa ne čudi  zač je cel album papren i pun proteini, kot da su se člani Po' metra crijeva (aš tako se zove ovi vokalno instrumentalni sastav) najili mešanega mesa s puno kapuli i bohtepitaj kakoveh još začini. Potle ne moreš samo popit malo mineralne pa podrignut da bi pasalo samo zdolun neh ti rabi celi važ pun vina za boju i efikasneju probavu.

Po' metra crijeva / Foto: Kristijan Vučković
Po' metra crijeva / Foto: Kristijan Vučković

PMC, kako njin i glasi službena kratica, već su fanj let aktivni na rečkoj scene, gjedal san ih par put, ma da ovako konkretno i, usudil bin se reć, genetski modificirano moru zvučat to stvarno ni za verovat! To van je kot neki amalgam od sopil, metalneh rifi ki se baziraju na istrijanskoj traj-naj-naj-ni-na-ne-na ljestvice, i teksti ki su, baren se mane tako čini, pod utjecajen tradicionalneh napjevi ma anke i štorij ke su lepo zapisali Boris Perić i Tomislav Pletenac, dveh Varaždinci ki se umeju lepše snać va našeh krajeh neh mi ki se dičimo da smo domoroci. Tako će si oni ki kupe CD od PMC se navadit ki j' bil Jure Grando z Kringi, kamo lete štrigi i si vrazi od Učke i z Ćićarije, ča je svarog, pa će se si spametit i onega Velega Jožeta ki i danas čuva Motovun, a bome će ovi artikal čakavskega metala zbudit i vrnut partizani na frontu aš vaja Istru još jedanput oslobodit od dušmani. I bome jušto kat san mislel da j' to se skupa samo lokalne tematike, PMC su mi doskočili z ironičnemi štosi univerzalnega karaktera. Tako se va Majk božjen dotiču ratneh profiteri ma i crekvineh dogmi, a va morda i najlepšoj, skoro i romantičnoj, kancone Ala boh i se!, kritiziraju Merikanci ki jako vole soldi pa prodaju bombi onemi z Bliskega istoka, pa jih ti isti, ki se nadaju da ih va raje čeka za plaću sedandesetidve device, gredu samoubilački zdignut va zrak ča ih jako jako veseli pa zijaju alaaaaaa...boh i se.

Da današnje sigurnosne službe delaju kako spada bi se zamisleli nad ovistemi mladići ki prizivaju anarhiju, šapiću va uho šestšestšest i smeju se katolibanen i fašisten, kvareć nan i indoktrinirajuć našu nevinu mladost. Suminjan da bi jih stara dobra udba samo tako pustila da štancaju ti kompaktni diski i raspačavaju po rasprodanemi koncerti! Zajeno bi jih va pržun pohitali, pobrojili njin koliko bubregi imaju si skupa pa onda saki za se, a za marendu bin njin servirali - vraga bin njih nutili pomfri i hamburgeri - malo blatne vodi i štrucu kruhu od pret petnajst dan! A na jedni poziv se moreš pozivat koliko ćeš, ne bi te mogal va kakoven škuren kamarine nać ni precjednik mjesne zajednice! Pa da vidiš kako bi vaje zakatnali po režimski, viva il duče nostro! Stvarno bi bilo škoda da ovisti album ne pasa na širen područje, neću reć regionalno ki zna ča to znači više, aš ova muzička zvonjava dotiče va najškureja mesta judskega postojanja, razotkriva su potkupjivost čovečje prirodi, a svetlost ka nan se nuti z neba vidimo kot neš nadnaravno, a zapravo j' samo svemir va soj svojoj lepote, baš kako i naš jedan jedini život kega imamo. A Po' metra crijeva se sen nan smeju z udobnega kauča na ken počivaju dokle štrigaju z onemi paganskemi heretičnemi besedami. Hitite to na svecko tržište, pojist ćete si oni štufni gogol bordelizmi! Ala šu mladići, ne štentajte!